ఒక విద్యావంతుడు విద్యాశాఖ మంత్రి అయితే ఫలితాలు ఇలా ఉంటాయి: కాలవ శ్రీనివాసులు

ఒక విద్యావంతుడైన నాయకుడు విద్యాశాఖ బాధ్యతలు చేపడితే ఫలితాలు ఎంత అద్భుతంగా ఉంటాయో, తాజాగా విడుదలైన పదో తరగతి ఫలితాలే నిదర్శనమని రాయదుర్గం ఎమ్మెల్యే కాలవ శ్రీనివాసులు కొనియాడారు. గురువారం తెలుగుదేశం పార్టీ కేంద్ర కార్యాలయంలో నిర్వహించిన విలేకరుల సమావేశంలో ఆయన మాట్లాడారు. రాష్ట్ర విద్యాశాఖ మంత్రి నారా లోకేష్ గత రెండేళ్లుగా అమలు చేస్తున్న సమూల సంస్కరణలు, వినూత్న విధానాల వల్లే ఈ అద్భుత ఫలితాలు సాధ్యమయ్యాయని ఆయన స్పష్టం చేశారు. ఈ విజయం విద్యార్థుల కృషితో పాటు, మంత్రి లోకేష్ అంకితభావానికి నిలువెత్తు నిదర్శనమని ప్రశంసించారు.

ఈ సందర్భంగా ఆయన గణాంకాలతో సహా వివరిస్తూ, గత ప్రభుత్వ హయాంలో 2022 నాటికి 67.26 శాతానికి పడిపోయిన పదో తరగతి ఉత్తీర్ణతను, కూటమి ప్రభుత్వం అధికారంలోకి వచ్చిన రెండేళ్లలోనే 85.25 శాతానికి చేర్చడం చారిత్రాత్మక విజయమన్నారు. ముఖ్యంగా ప్రభుత్వ పాఠశాలల్లో ఉత్తీర్ణత శాతం గతేడాది 72.8 శాతం ఉండగా, ఈసారి అది 78.39 శాతానికి పెరగడం ప్రభుత్వ పనితీరుకు అద్దం పడుతోందని పేర్కొన్నారు. ఇది పేదరిక నిర్మూలనకు విద్య ద్వారా వేస్తున్న తొలి అడుగు అని అభివర్ణించారు.

బాలికల విద్యకు మంత్రి నారా లోకేష్ ఇస్తున్న ప్రాధాన్యత కారణంగానే, బాలికలు 87.90 శాతం ఉత్తీర్ణత సాధించి బాలుర కంటే 5.22 శాతం ముందున్నారని కాలవ వివరించారు. అలాగే ఆంధ్రప్రదేశ్ రెసిడెన్షియల్ స్కూల్స్ 96.04 శాతం ఉత్తీర్ణతతో రికార్డు సృష్టించాయని తెలిపారు. కూటమి ప్రభుత్వం ప్రతిష్ఠాత్మకంగా అమలు చేస్తున్న 'సూపర్ సిక్స్' హామీలలో భాగమైన 'తల్లికి వందనం' పథకం ద్వారా ఏటా రూ.15,000 ఆర్థిక సాయం అందించడం బడి మానేసే వారి సంఖ్యను తగ్గించి, ప్రభుత్వ పాఠశాలల్లో విద్యార్థుల నమోదును ప్రోత్సహిస్తోందని అన్నారు.

విద్యావ్యవస్థను బలోపేతం చేసేందుకు ప్రభుత్వం చేపట్టిన విప్లవాత్మక మార్పులను ఆయన వివరించారు. రాష్ట్రవ్యాప్తంగా 9,600 ఆదర్శ ప్రాథమిక పాఠశాలల ఏర్పాటు, ఒక తరగతికి ఒక టీచర్ విధానం, దేశంలోనే తొలిసారిగా నిర్వహించిన 'మెగా పీటీఎం' వంటి కార్యక్రమాలు విద్యా ప్రమాణాలను తిరిగి గాడిన పెట్టాయని తెలిపారు. రాజకీయాలకు అతీతంగా, విద్యావేత్త డాక్టర్ సర్వేపల్లి రాధాకృష్ణ గారి పేరుతో విద్యా కిట్లు, అన్నదాత డొక్కా సీతమ్మ గారి పేరుతో నాణ్యమైన మధ్యాహ్న భోజనం అందించడం ప్రభుత్వ చిత్తశుద్ధికి నిదర్శనమన్నారు.

గత ప్రభుత్వ హయాంలో అంబేద్కర్ వంటి మహనీయుల పేర్లను పథకాల నుంచి తొలగించారని, చిన్న పిల్లలకు ఇచ్చే చిక్కీలపై కూడా తమ ఫొటోలు వేసుకున్న సంస్కృతి వారిదని కాలవ శ్రీనివాసులు విమర్శించారు. విద్యాశాఖను మంత్రి లోకేష్ ఒక సవాలుగా స్వీకరించి అభివృద్ధి పథంలో నడిపిస్తున్నారని ప్రశంసించారు. సమాజంలో మార్పునకు విద్యే సరైన మార్గమని నమ్ముతూ, విద్యార్థులందరూ శ్రీశ్రీ ఆశయాలకు అనుగుణంగా ప్రపంచ వేదికలపై విజయాలు సాధించాలని ఆయన ఆకాంక్షించారు.